Mehmeti: Dëshmia e parë për arbërit në Kosovë vjen nga DrenicaNga Konica.al - 18 Dhjetor, 2017, 3:28
Kur përmenden arbërit për herë të parë në territoret e Kosovës së sotme?
Kjo pyetje zakonisht eklipsohet nga çështja e përmendjes së arbërve në burimet bizantine në kontekstin rajonal të Perandorisë Bizantine, shkruan Konica.al.
Sipas njohësit të historisë nga Prishtina, Salih Mehmeti, dëshmia e parë eksplicite për praninë e arbërve në Kosovë i takon vitit 1253.
”Bëhet fjalë për një diplomë të mbretit Stefan Uroshi I me privilegje për manastirin e Shën Pjetrit dhe Pavlit në Lim”, ka shkruar ai në një shënim mbi këtë çështje.
Në këtë dokument, sipas tij, njëfarë Mirosllavi, feudal serb i sapovendosur në Kosovë, përcakton kufirin tokësor të katundit Krushevc (në veri të Drenicës), afër manastirit të Deviçit, ku përmendet toponimi «Arbanaški potok» (Арбанашски поток).
![Dëshmia e parë për arbërit në Kosovë vjen nga Drenica Byzz](https://2img.net/h/konica.al/wp-content/uploads/2017/12/byzz.jpg)
“Në pamje të parë, kjo dëshmi mund të interpretohet, siç është interpretuar shpesh, edhe si indicie për në mjedis joshqiptar, pasi që do të ishte krejt e pakuptimtë të specifikohej me emfazë diçka shqiptare në një mjedis shqiptar. Por duhet të kihen ndërmend edhe disa konsiderata plotësuese:
1. Privilegji në fjalë është i shkruar për interesat e një feudali serb dhe jo të gjitha tokat ishin në juridiksionin e nemanjiçëve apo pushtetit kishtar.
2. Diminutivi i hershëm bullgaro-sllav –ko lë të kuptohet se Arbanashki ka qenë edhe vendbanim (katund), dhe si i tillë duhet të jetë formuar në kohën e palatalizimit të frikatives /s/ në /sh/, një fazë e hershme e shqipes, dmth disa qindra vite para se serbët të pushtonin Kosovën dhe Maqedoninë.
3. Vetë biografët serbë të Nemanjës, Sava dhe Stefani, i referohen tokave të Kosovës dhe Maqedonisë si «grchke zemlje», që shënjon prima facie juridiksionin dhe përkatësinë shtetërore bizantine, të një territori të banuar me arbër ortodoksë”, ka shkruar Mehmeti. /konica.al/
Burimi:
http://konica.al/2017/12/mehmeti-deshmia-e-pare-per-arberit-ne-kosove-vjen-nga-drenica/