Inkubacioni

Inkubacioni – ishte rit magjik që praktikohej, duke fjetur natën brenda ose pranë faltores të një perëndie të shërimit si Asklepi, për të marrë vesh nga perëndia përmes ëndrrave të ardhmen, apo shërimin e ndonjë sëmundjeje.

Ndër ortodoksët shqiptarë të trevës së Korçës, E Shtuna e Pulave, që quhet edhe E Shtuna e Shpirtrave, ishte e shtuna një javë para të dielës së karnavaleve ortodokse dhe fillimit të kreshmëve. Herët në mëngjes therej një pulë dhe, me gjakun e saj, të gjithë anëtarët e familjes bënin një kryq në krahëror e në ballë. Pas meshës, besimtarët e kishin zakon të mblid-heshin në hajatin e kishës për t'u shtrirë e për të marrë një sy gjumë, me mendimin se, në ëndërr, do të shihnin shpirtrat e të vdekurve. Kur zgjoheshin, i thonin njëri-tjetrit ç'kishin parë.